Саргылана Афанасьевна Рожина – Амма улууһа биир тумус туттар урбаанньыта. Кэргэнинээн Тимофей Дмитриевич Григорьевтыын дьиэ көтөрүн, мүөттээх ыҥырыаны иитэннэр дохуот аахсалларын таһынан олохтоохтору бэйэ аһынан хааччыйаннар дьон махталын ылыахтарын ылаллар.

-Арҕааҥы дойдулар санкциялары киллэрбиттэрэ биһиэхэ, олохтоох урбаанньыттарга сайдарга улахан кыаҕы биэрдэ. Олорон биэрбэккэ үлэлиэххэ, кэҥиэххэ, доруобуйаҕа туһалаах аһы-үөлү хото тарҕатыахха. Биһиги төһө баҕарар киирии аһылыга суох бэйэбитин хааччыныахпытын сөп ээ. Хайаан даҕаны урбаанньыт буолуохха, биисинэстэниэххэ наада диэбэппин. Түргэнник ситэр салааны хас биирдии ыал тутар кыахтаах. Холобура, бройлер куурусса баара-суоҕа 56 хонугунан ситэр, сиэххэ сөп буолар. Аҕыйах даҕаны устууканы улаатыннаран хаһаанан кэбистэххэ туох даҕаны ааттаах аһылык буолар. Онно эбии сымыыттыыр кууруссаны иитэн сибиэһэй сымыытынан хааччыныахха.

Биһиги „Мэҥкэр“ хаһаайыстыбабытыгар кууруссаны, индюгу иитэн тыыннаахтыы даҕаны, этин даҕаны, сымыыт, мүөт атыылыыбыт. Дьон олус наадыйар, кыһыннары-сайыннары атыыга барар, ордук саас кууруссаҕа наадыйыыы улаатар. Бородууксуйабыт туох да эбилигэ суох, сибиэһэй буолан былдьаһыгынан кэриэтэ батарыллар. Мүөппүт бэл Россия Президенигэр Владимир Путиҥҥа барбытынан киэн туттабыт.

Билиҥҥитэ икки хотонноохпут даҕаны, кэҥэтэр санаалаахпыт. Хаһаайыстыбабыт хаҥаан иһэр, 6х6 уонна 4х5 миэтэрэ иэннээх хотоннорбут кыараҕас буоллулар. Былырыын „Агростартабынан“ Граҥҥа тиксибиппит, онтубут харчыта күһүн хойут кэлэн, саҥа хотоммут тутуутун быйыл, ыам ыйыттан саҕалыахпыт. 21 миэтэрэ уһуннаах улахан хотон буолар. Онон, урбаанньыттары өйүүр бырагыраамалар көмөлөрүнэн, Дойду, өрөспүүбүлүкэ салалтатын өйөбүлүнэн олохтоох бородууксуйаны өссө дэлэтэн нэһилиэнньэни хааччыйар кыахпыт улаатыа.

«Амма олоҕо» хаһыат.

С сайта «Улус Медия»: https://ulus.media/article/48087

от adminNB

Добавить комментарий

Ваш адрес email не будет опубликован.