Ааспыт сайын курааннаан, от аанньа үүммэккэ, улууспут баһылыга Степан Саргыдаев уонна улуустааҕы тыа хаһаайыстыбатын управлениетын исписэлиистэрэ быйылгы кыстыгы этэҥҥэ аһарар туһугар үгүс өрүттээх үлэни-хамнаһы тэрийэллэр.
Ол курдук, туһааннаах үлэһиттэр саҥа дьыл иннинэ сүөһү дороххой аһылыгын өрөспүүбүлүкэ иһиттэн атыылаһыыга тиэйэр — таһар ороскуоттарын уйунан, субсидиялаах эбии аһылыгынан хааччыйан, хаһаайыстыбаларга түҥэттилэр.
Тыа хаһаайыстыбатын управлениетын кылаабынай зоотехнига Мария Макарова билиһиннэрбитинэн, сылгыга эбиэс, ынах сүөһүгэ комбикорм, гранулированнай от кэлэн, хаһаайыстыбаларга тарҕаммыт.
Онуоха урукку сылларга “хаһан да харахтаан көрбөтөх” гранулированнай оту хайдах сиэтэри үгүс киһи билбэт. Бэйэлэрэ билэллэринэн сиэтэн, “ууга-уокка түһэллэрэ”, сылгыларыттан, сүөһүлэриттэн “ытыс соттон” хаалаллара баар чахчы.
Маннык аһылыгы ынах сүөһү нуорматтан таһынан сиэтэҕинэ, улахан охсуулаах, иһэ үллэн, өлөр да түбэлтэлэрэ тахсыталыыр. Оттон сылгы олох да сиирэ көҥүллэммэт. Онон дьоммутугар-сэргэбитигэр бу аһылык туһунан билиһиннэрэригэр кылаабынай зоотехниктан Мария Ньургустановнаттан көрдөстүбүт.
Гранулированнай от сылгыга сиэтиллибэт. Ынах сүөһүгэ – ыанар ынахха, оҕуска кураанахтыы эбэтэр ууга үлүннэрэн, күҥҥэ 1.5 кг бэриллэр.
Ынах сүөһү 1, 5 кг сиэтэҕинэ, иһигэр киирэн үллэн, 4 кг оту сиэбиккэ тэҥнэһэр. Тиҥэһэ 0,8 кг гранулированнай оту сиэн сөп. Иһигэр киирэн үллэн, 2,4 кг оту сиэбиккэ тэҥнэһэр. Оттон ыччат сүөһүгэ, борооҥҥо уонна сылгыга сиэтэр олус сэрэхтээх, букатын да сиэппэккит ордук.
Анна Захарова
«Саха Медия» сайтыгар: https://xn--80aa7aggbp2b.xn--p1ai/article/87992