Баһылык Дмитрий Варламов I Дьөппөҥҥө 2020 сыллаахха талыллан үлэлии олорор. Бүппэт түбүктээх нэһилиэк олоҕо, баһылык дьонун-сэргэтин иннигэр төһө эппиэтинэстээхтик кыһаллан туран үлэлиириттэн тутулуктаах. Нэһилиэккэ сүөһүлээх-астаах дьоҥҥо кыстык этэҥҥэ ааһан иһэр, быйылгы дьылга отторо тиийэр. Сылаас ситимигэр холбонон олорор ыалларга уонна тэрилтэлэргэ хочуолунайдарыгар оттук чохторо толору баар.

Бүгүн сылааһынан хааччыйыы, дьоҕус паарка уонна тыа хаһаайыстыбатын салаатыгар үлэ туһунан үс сүрүн ыйытыкпар Дмитрий Варламов маннык хоруйдаата:

Сылаас ситимигэр холбонуу былааннара

— Биһиги нэһилиэкпитигэр Петр Марков маастардаах «Юпитер» ХЭТ хочуолунайа үлэлээбитэ хаһыс да сыла. Билиҥҥи туругунан нэһилиэк дьаһалтатын дьиэтигэр, култуурнай-спортивнай комплексыгар, уопсай дьиэлэригэр уонна 40-тан тахса ыалга сылааһы биэрэ олороллор. Кинилэр нэһилиэк дьаһалтатыгар бырайыак киллэрбиттэрэ. Быйыл Тиит Эбэҕэ 55 ыалы сылаас ситимигэр эбии холбуур былааннаахтар. Билигин хочуоллар кыамталарын оҥотторо сылдьаллар. Онно 6 км уһуннаах сылаас ситимин тыраассата эбии тардыллыахтаах. Оччоҕо нэһилиэкпит улахан аҥаарын олохтоохторо итиигэ холбонуохтара.

Онтон Хоточчуга СӨ Бырабыыталыстыбатын 2021 сыл балаҕан ыйын 6 күнүнээҕи судаарыстыбаннай бүддьүөтүн суотугар «Автономнай сылааһынан хааччыйыыны сайыннарыы» диэн уурааҕар олоҕуран куонкуруска кыттыбыппыт. Ол түмүгэр ааспыт сылга 12 уст. (2 мөл солк тахса сууммаҕа) «Саха Лиепснеле» ХЭТ оҥорор «LiepsneIe» оһохтору ылбыппыт. Ити оһохтор саҥа дьыл иннинэ кэлбиттэрэ, муус устар саҥатыгар дылы Сөбүлэһии быһыытынан, Хоточчу учаастагын «Молодежнай» уулуссатыгар олорор 12 ыалга туруоран холбуохтаахпыт.

«1000 тиэргэн»

— Сахабыт сиригэр «Уһук Илиҥҥи эрэгийиэҥҥэ 1000 тиэргэн» бырагырааммаҕа бырайыактары талыы икки түһүмэҕинэн ыытыллыбыта. Бу куонкурус түмүгүнэн биһиги нэһилиэкпит «Тиит Эбэ нэһилиэгэр дьоҕус паарка» диэн бырайыакпыт Кыайыылаахтар испииһэктэригэр киирбитэ. Дьоҕус паарка 6 075 кв миэтэрэ иэннээх буолуоҕа уонна нэһилиэкпит киинигэр Пелагея Никифорова аатынан переулокка оҥоһуллуоҕа. Манна оҕо оонньуур былаһааккалара, сүүрэр суол, скейтборд былаһаакката (скейтборд, велосипедынан, ролигынан, самокатынан хатааһылыырга), воркаут зоната баар буолуохтара. Уопсайынан оҕолор, ыччаттар , орто уонна аҕа саастаах дьон сөбүлээн сылдьыахтара. Итини сэргэ дьон-сэргэ дьиэ кэргэнинэн сынньанарыгар, спордунан дьарыктанарыгар олус табыгастаах буолуо дии саныыбын. Нэһилиэкпит тас көстүүтэ да тупсуо, сыллата пааркабытын сайыннара уонна тупсара туруохпут. Сайыҥҥы өттүгэр көҕөрдүү үлэтигэр олохтоохтор көхтөөхтүк кыттыахтара диэн эрэллээхпин.

Хороҕор муостаах, сыспай сиэллээх эбиллэр

— Тыа сиригэр олорорбут быһыытынан, ааспыт сылга Тыа хаһаайыстыбатын министиэристибэтэ ыытар «Агростартап» куонкурсугар кыттан Яндреев Спиридон, Егоров Николай грант ыллылар. Быйылгы сылга Тиит Эбэттэн уонна Хоточчуттан бу ынах сүөһүнү иитиигэ, сылгыны көрүүгэ уонна оҕуруот аһын үүннэриигэ киирсээри гыналлар. Биһиэхэ I Дьөппөн нэһилиэгэр Егоров Яков, Марков Петр, Атласов Михаил, Тарасов Родион, Кириллин Станислав курдук хоһуун уоланнар тыа хаһаайыстыбатыгар үлэлииллэр. Хоточчуттан Матвеев Василий сүөһүтүн төбөтүн ахсаанын элбэттэ. Нэһилиэкпитигэр ынах сүөһү, сылгы ахсаана кыралаан эбиллэр.

Сэргэх көрүүлээх, дьону-сэргэни түмэ тардар баһылыктаах нэһилиэктэр тэтимнээхтик сайдаллар. Тиит Эбэлэр баһылыктарын тула түмсэннэр аныгы олоҕу кытта тэҥҥэ хардыылыыллар.

Уйбаан Уйгуурап

«Хаҥалас» хаһыат сайтыттан: https://xn--80aaaaaqpp6as1cq2a.xn--p1ai/article/39996

от adminNB

Добавить комментарий

Ваш адрес email не будет опубликован.