Нам улууһун Аппааны бөһүөлэгэр 2017 сыллаахтан Саргылана Лукина чугас дьонунаан тюльпан үүннэрэн, Дьахтар күнүн көрсө бырааһынньык суолтатын үрдэтэрин билэбит. Итини таһынан саҥаттан саҥа үүнээйини, сибэккини олордон боруобалаан көрөр идэлээх. Ол курдук, ааспыт сылтан оҕурсу үүннэрэн кыһыҥҥы томороон тымныыга бэйэтин оҕурсутунан дьонун күндүлээтэ.
Саргылана Ильична 15 сыл И.Е. Винокуров аатынан Хатыҥ Арыы орто оскуолатыгар учууталынан үлэлээбитэ. Үтүө майгылаах учуутал үөрэнээччилэрэ (билигин орто саастаах үлэһит дьон) күүс-көмө буолалларын тоһоҕолоон этэр.
«Дьон куоракка киирэн иһэн Сыырдаахха баар теплицаларга хараҕа куруутун быраҕыллар буолуохтаах. Ол курдук, үөрэппит оҕолорум биирдэ куоракка киирэн иһэн «Саюри» теплицаларын көрөн баран, учууталбыт Саргылана Ильична үүннэрэн көрүөн сөп эбит дии диэн санааҕа кэлбиттэр уонна миэхэ кэлэн оҕурсу үүннэрэн боруобалаан көр, теплица тутуутугар биһиги көмөлөһүөхпүт диэн этии киллэрбиттэрэ», — диэн оҕуруотчут махтанардыы ис санаата көтөҕүллэн туран санаатын үллэһиннэ.
Онтон сыта-тура толкуйдаан баран, олбуорун биир муннугар теплица туттуохха сөп эбит диэн санааҕа кэлэн үп булунар санааҕа кэлбит. Ол курдук, «Туймаада» ФАПК-ҕа кредит ыларга сайаапкалаабыттара табыллан хаалбыт. Онон алтынньы ыйга теплица тутуутун саҕалаан сэтинньи ыйга бүтэрбиттэр. Тутуу табыллыбыт, сөптөөх ититиини биэрэр, бетон муостата аннынан ититиллэр буолан буор сылаас. Бастакы оҕурсуну ахсынньы ыйга сиэбиттэр.
Биллэн турар, кыһын оҕурсу үүннэрэргэ суорду талыы биир сүрүн сорук буолар. Онон элбэҕи үөрэтэн, ырытан көрөн баран «Манул» фирма «экспедиция» уонна «шираз» суордун таланнар 300 угу олордубуттар. Бу суортар 40 хонук иһинэн ситэн астарын биэрэллэр эбит. Эрдэ олордубут уктарын ыраастаан номнуо саҥа арассаадалар быкпыттар. Билигин оҕуруот аһын, сибэккини олордорго хаачыстыбалаах буоллун диэн анал лаампалары туһаналлар. Аныгы үйэ сабыдыалынан «өйдөөх» розеткалары ыланнар (бириэмэтин туруоран биэрэн онон холбонор, арахсар) гына оҥорбуттар. Инникитин бэйэтэ уу кутар систиэмэни туруорарга былааннаналлар.
«Бастакы саҕалааһын буолан өссө да билбэппит элбэх. Урукку сылларга сибэкки олордорбутугар ноһуомунан бэйэбит буор оҥорорбут. Билигин элбэх буор наада буолан атын сиртэн тиэйтэрэн аҕалбыппыт. Ол иһин, буорбут хаачыстыбатын билээрибит куоракка анал чинчийэр лабораторияҕа ыыппыппыт. Бастакы сиппит оҕурсуларбытын бэйэбит маҕаһыыммытыгар «Солнышкаҕа» атыылаабыппытыгар бэрт хамаҕатык ылбыттара. Ситэн-хотон дэлэйдэк үүннэҕинэ чугастааҕы маҕаһыыннарга туттаран атыылаттарыахпыт. Бириэмэтигэр сөпкө дьаһаннахха оҕурсуну көрүү-истии элбэҕи эрэйбэт, онон дьиэ кэргэн дохуотун хаҥатыахха сөп эбит», — диэн кэпсээнин ситэрэн-хотон биэрэр.
Семен Аргунов
«Эҥсиэли» хаһыат сайтыттан: https://xn--h1aaigu4ed.xn--p1ai/article/88566
Лукиннар тустарынан пост:
Якутская семья выращивает в деревне тюльпаны