Бүгүн, ахсынньы 13 күнүгэр, СӨ бырабыыталыстыбатын бэрэссэдээтэлэ Андрей Тарасенко “Ынах сүөһү уонна сылгы 2022-2023 сс. бигэ кыстыгын тэрийиигэ Саха Өрөспүүбүлүкэтин судаарыстыбаннай бүддьүөтүттэн олохтоох бүддьүөттэргэ атын бүддьүөттэр икки ардыларынааҕы үбү тыырыы туһунан” 1186-с №-дээх дьаһалы таһаарда. Бу дьаһалга олоҕуран, Тыа хаһаайыстыбатын министиэристибэтэ быйыл сайын айылҕа содулуттан эмсэҕэлээбит улуустарга 135 540 657 солкуобайы ыытыаҕа.

Көмө үбү тыырыы испииһэгэр барыта 11 улуус (Кэбээйи, Бүлүү, Куорунай, Чурапчы, Эбээн Бытантай, Үөһээ Дьааҥы, Өлүөхүмэ, Өлөөн, Үөһээ Бүлүү, Нам, Таатта) киллэриллибит. Саамай элбэх үп Чурапчы (34,2 мөл. солк.), Бүлүү (32 мөл. солк.), Кэбээйи (27,7 мөл. солк.), Куорунай (13,7 мөл. солк.), Үөһээ Дьааҥы (11,6 мөл. солк.) улуустарыгар тиийиэҕэ.

Көмө оту уонна эбии аһылыгы (уотурбаны, бытарытыллыбыт оту, эбиэһи) атыылаһыыга уонна оту тиэйиигэ көрүллэр. Ол гынан баран, барыларыгар тэҥ, биир күдьүс буолбатах. Холобур, от атыытын толуйуу Кэбээйи, Бүлүү уонна Үөһээ Бүлүү улуустарыгар эрэ оҥоһуллуо. Оту тиэйиигэ субсидиянан Эбээн Бытантайтан, Өлөөнтөн уонна Өлүөхүмэттэн уратылар бары туһаныахтара. Ити үс улууска от атыылаһыы-тиэйии көрүллүбэт, эбии аһылыгы атыылаһалларыгар уонна тиэйэллэригэр көмө ылыахтара. Эбии аһылыгы атыылаһыы ороскуота Үөһээ Бүлүүттэн, Намтан, Тааттаттан уратыларга толуйуллуо.

Дьэ, онон 135,5 мөл. солкуобайтан от атыытыгар 12,5 мөл., эбии аһылык атыытыгар 75,3 мөл. уонна оту тиэйиигэ 47,6 мөл. солкуобайа ороскуоттаныаҕа. Министиэристибэ туһааннаах департаменын салайааччыта Вячеслав Гаврильевтан чуолкайдаспыппынан, уотурба, бытарытыллыбыт от уонна эбиэс атыытыгар көрүллэр 75,3 мөл. солкуобай кээмэйдээх көмө үп иһигэр, тиксэриллиэхтээх сирэ төһө ырааҕыттан тутулуктанан, тиэйии-таһыы ороскуотун сорҕотун толуйуу үбэ эмиэ угуллан сылдьар эбит. Бу сыл иһинэн барыта 9 тыһ. туонна от уонна 5 тыһ. туонна эбии аһылык тиэйиитигэр көмө оҥоһуллар.

Хаартыска: СИА

Василий Никифоров

«Улус Медия» сайтыттан: https://ulus.media/article/82676

от adminNB

Добавить комментарий

Ваш адрес email не будет опубликован. Обязательные поля помечены *