Хас биирдии тыа ыала кэтэх хаһаайыстыбатын табыгастаахтык тэринэн, дьаныардаахтык үлэлээн-хамсаан уйгутун оҥостор. Быйыл Кытыл Дьураҕа бааһынай хаһаайыстыбалар сыыйа эбиллэн сэттэ киһи буолла. Кинилэр оттуулларын быыһыгар үрүҥ илгэлэрин, үүттэрин лиитэрэтин 70 солк «Южнай» ХЭТ туттараллар. Биирдиилээн кэтэх сүөһүлээх дьон үүттэрин туттарбаттар, сүөгэй оҥорон атыылыыллар, дохуоттарын эбинэллэр.​

​Баһылык Николай Осипов нэһилиэгэр сайыҥҥы кэмҥэ ыытыллар үлэлэр тустарынан бу курдук телефонунан кэпсээтэ:

— Оттооһун саҕаланыаҕыттан

уу улахана мэһэй буолла. Бүгүҥҥү күн кыралаан түһэ турар. V Малдьаҕар нэһилиэгэ быйыл оттооһуҥҥа 450 туонна былааннаах, онтон аҥаарын оттоон олороллор. От үүнүүтэ орто, кырдай сиргэ мөлтөһүөр.

Тыа сиригэр ханна да курдук билигин тиэхиньикэнэн оттууллар. Кэтэх сүөһүлээх дьоннор барыта 20-тэн тахса тыраахтарынан, ыал аайы баар мотоблоктарынан күнү былдьаһа сыралаһан туран үлэлииллэр. Оттуур арыыларбытыгар «Кыыллаахха» уонна «Иирэ арыыга» ходуһа ордор. Ону быйыл аһыҥка үөскээн оттооһуҥҥа уустуктары көрсүбүт Чурапчы улууһун отчуттара кэлэн көрүөхтээхтэр.

​ Кэлэр кыстыгы көрсө ОДьХХ Хаҥаластааҕы филиала (дириэктэр Дмитрий Николаев, кыл инженер Семен Пахомов) «Балыыһа» хочуолунайыгар WiIo BL -40/140-4/2сетевой насоһу уларыппыттара. Бэйэбит учаастакпыт үлэһиттэрэ атырдьах ыйыгар ититэр ситим тыраассатын бүрүйүөхтэрэ, хочуолунайдары өссө төгүл көрүөхтэрэ, бэлэмнэниэхтэрэ. Салгыы кэпсиир буоллахха, кэлэр нэдиэлэ ортотун диэки уу ситимин тардарга бэдэрээччиккэлиэҕэ. Эрдэ эппитим курдук былырыын «Олохтоох көҕүлээһини өйөөһүн» анал бырагырааммаҕа кыттан нэһилиэкпит устатынан тухары 5 км уһуннаах сайыҥҥы уу ситимин тардыбыппыт. Быйыл иккис түһүмэҕин оҥоруохпут, уу хачайдаан ууну хаһаанар улахан икки 60 куб емкостары туруоруохпут. Итини сэргэ, былырыын сорох ыаллар хабыллыбакка хаалбыттарын ситэрэн киллэриэхпит.Атырдьах ыйыгар күүтүүлээх-кэтэһиилээх суотабай сибээспит «Билайн» 4G тендербитин ааспыппыт. Бэдэрээччик кэлэн холбоотоҕуна, сибээспит киириэҕэ.

​Улууспут дьаһалтата (баһылык Олег Иринеев) Дьиэ кэргэн экэниэмикэтин сайыннарыыга анаан ыытар үлэтинэн, быйыл сааһыары-сайын 165 төбө куурусса, 4 сибиинньэ ылбыппыт. Дьон сымыыкка наадыйыытын толордубут. Маҕаһыыҥҥа сымыыт аҕалбат буоллулар. Итини сэргэ, быйыл сөптөөх ардахтар түһэннэр ыалларгахортуоппуй, оҕуруот аһын үүнүүтэ үчүгэй,- диир баһылык Николай Петрович.

Кытыы нэһилиэккэ Кытыл Дьураҕа кыһарыйар кыһалҕа да элбэх буоллаҕа. Ону толорорго эдэр киһи, баһылык Николай Осипов дьонун-сэргэтин иннигэр ылыммыт сорудаҕын олоххо киллэрэргэ кэлэр-барар, түбүгүрэр. Олохтоох киһи дохуоттаах буоллаҕына, бигэ туруктаах буолуоҕа. Баһылык түбүктээх үлэтэ түмүктээх буоларыгар баҕарабын.

Уйбаан УЙГУУРАП, газета «Хангалас»

Ссылката: https://xn--80aaaaaqpp6as1cq2a.xn--p1ai/article/66437

От adminNB

Добавить комментарий

Ваш адрес email не будет опубликован. Обязательные поля помечены *