Нам улууһун дьаһалтата үс уонна үстэн элбэх оҕолоох дьиэ кэргэттэргэ Ленскэй нэһилиэгэр — 85, Хамаҕаттаҕа — 184, Хатыҥ Арыыга — 40, I Хомустаахха — 59, Модукка — 24, Никольскайга — 90, улуус үрдүнэн уопсайа 482 уһаайбаны түҥэттэ. Өссө 65 уһаайба докумуона ситэн, ананыаҕа. Инньэ гынан, Нам улууһун сиригэр-уотугар барыта 547 учаастак бэриллиэҕэ. Сир учаастактара Нам улууһун генеральнай былааныгар киирбиттэр, уу ылбат сиригэр бааллар. Инникитин инженернэй инфраструктуранан хааччыллыахтара.

Россия Президенэ В.В. Путин дьаһалыгар олоҕуран, элбэх оҕолоох ыаллары өйүүр стратегическэй сыал-сорук турар. Онуоха Нам улууһун баһылыга Юрий Слепцов 2022 сыл от ыйыгар диэри элбэх оҕолоох дьиэ кэргэттэри 100% уһаайбанан хааччыйыы туһунан дьаһал таһаарбыта.

Улууска элбэх оҕолоох ыалларга уһаайба сирин түҥэтии бу сааскыттан саҕаламмыта. Ол курдук, аан бастакынан Модут нэһилиэгэр 24 ыал дьиэ тутталларыгар анаан сир учаастагын сертификатын үөрүүлээх түгэҥҥэ туппуттара. Учаастакка тиксибит дьон уһаайбаларын сэрэбиэй быһыытынан ылбыттара.

* Бэс ыйын 29 күнүгэр улуус киинигэр, Нам сэлиэнньэтигэр, урукку асфальт-бетон оҥорор собуот сиригэр, элбэх оҕолоох ыалларга сир учаастагын сертификатын улуус баһылыга Юрий Слепцов уонна Ленскэй нэһилиэк баһылыга Петр Сокольников туттарбыттара.

Тыырыллыбыт сирдэр сэрэбиэй быһыытынан 85 ыалга түҥэтиллибиттэрэ.

 Бэс ыйын 30 күнүгэр Хамаҕатта нэһилиэгин элбэх оҕолоох ыалларыгар сир учаастагын сертификатын туттарыы үөрүүлээх тэрээһинэ барда.

Улуус баһылыга Юрий Слепцов элбэх оҕолоох ыаллары кытта бииргэ үөрүүлэрин үллэстэринэн киэн туттарын эттэ. “Ыал – судаарыстыба тирэҕэ. Дьиэ кэргэн төһөнөн бигэ тирэхтээх да, соччонон дойду бөҕө туруктаах. Онон былаас өттүттэн дьиэ кэргэҥҥэ тустаах болҕомто ууруллар.

Хас биирдии ыал дьиэтин тупсаҕай оҥоһуулаах, аныгы ирдэбилгэ эппиэттиирдии толору хааччыллыылаах гына туттарыгар”, — диэн баҕа санаатын эттэ.

Хамаҕатта уонна улуус кэккэ нэһилиэктэрин элбэх оҕолоох ыалларыгар «Нэлэгэр” квартал арҕаа өттүгэр, Аҕабыыт дьааһыйбыт диэн сиргэ, уопсайа 130 уһаайба сирин сертификата ананна.

* От ыйын 6 күнүгэр Нам улууһун баһылыга Юрий Слепцов Хатыҥ Арыы нэһилиэгин элбэх оҕолоох ыалыгар уһаайба түҥэтиитин үөрүүлээх түгэнин ыытта. Бу күн Хатыҥ Арыыга 40 сертификат туттарылынна.

Юрий Слепцов: «3 сыл уһаайба түҥэтиллибэккэ, сорох уочаракка турбут ыаллар оҕолоро улаатан, туспа хаһаайыстыба буоллулар. Бу дьоҥҥо утары баран, уһаайба аныырга быһаардыбыт.

Саҥа микрооройуоннарга уталыппакка дьиэ туттан, социальнай газификация программатынан газ киирэрин курдук дьаһаныахтааххыт. 2026 сылга диэри бу сирдэргэ уот, газ ситимнэрин тардан, олорор усулуобуйаны тэрийиэхпит. Тутууну ыытан, оҕолоргутун дьиэлииргитигэр баҕарабын» — диэн тоһоҕолоон эттэ.

* Улуус баһылыга Юрий Слепцов Дьиэ кэргэн күнүн көрсө, от ыйын 7-8 күннэригэр, Хамаҕатта уонна Никольскай нэһилиэктэригэр элбэх оҕолоох ыалларга анаан сертификаттары үөрүүлээх-быһыыга майгыга туттарда.

Бэриллибит сир инженернэй инфраструктуратын оҥоруу олохтоох салалта болҕомтотугар сылдьар. Ана аҕыйах сылынан бу нэһилиэктэр олохтоохторун ахсаана элбиир чинчилээх, нэһилиэктэр өссө үүнэр-сайдар кэскилээхтэр.

Нам улууһугар дьиэ кэргэн бөҕө туруктаах буолуутугар бара турар үлэлэр үтүө түмүктэрдээх буоллуннар!

«Нам улууһа» МТ пресс-сулууспата

«Улус Медия» сайтыттан: https://ulus.media/article/64561

от adminNB

Добавить комментарий

Ваш адрес email не будет опубликован.