Өрөспүүбүлүкэҕэ туораахтаах култууралары суортуур түөрт учаастак баар буоллаҕына, Мэҥэ Хаҥалас улууһун Ороссолуода нэһилиэгэр оҕуруот астарын суортуур учаастак 1995 сылтан таһаарыылаахтык үлэлээн кэллэ.

Ити кэм устата учаастак үлэһиттэрэ аска барар уонунан үүнээйи суортарын үүннэрэн чинчийэн, кэтээн көрөн олох киэҥ аартыгар таһаардылар. Учаастак салайааччыта, кылаабынай агроном Маргарита Антонова этэринэн, кинилэр Арассыыйа анал испииһэгэр киллэриллибит үүнээйилэри эрэ кытта үлэлэһэллэр.

Билигин ыстаакка кэргэнэ, барытыгар дэгиттэр үлэһит, агроном Эдуард Антоновтыын иккиэлэр уонна нэһилиэк олохтоохторо кэлэн үлэлээн абырыыллар. Субуотунньуктаан оҕуруот аһын олордоллор. Учаастакка уопуттары оҥороллор, суортары үөрэтэллэр. Билигин хортуоппуй 17 (онтон уона эрдэ ситэр, сэттэтэ хойутуу ситэр суортар), хаппыыста 8 (эрдэтээҥилэр уонна хойутууҥулар), моркуоп 8, оҕурсу 7, сүбүөкүлэ, помудуор, биэрэс 4-түү суортарын үүннэрэр былааннаахтар. Хортуоппуйдарын барытын олордубуттар. Бэс ыйын 8 күнүгэр моркуоп, 10 күнүгэр помудуордар уонна биэрэстэр, 11 күнүгэр эрдэтээҥи хаппыыста олордуллубуттар. Помудуор уонна биэрэс арассаадаларын олордууну Маргарита Ильинична өссө кулун тутартан дьиэтин түннүктэригэр олордон саҕалаабыт. Арассаадаларга 2 тэпэлииссэлээхтэр. Учаастак бааһынатыгар, суолу уу ылан, хойутуу, ыам ыйын 28 күнүгэр, киирбиттэр. Барыта 5 гааҕа үүннэрэр соруктаахтар. Хортуоппуйу 4 гааҕа олордубуттар. Үс суорка элбэтэн киэҥ үүннэриигэ таһаарыы үлэтин ыыталлар: “Любаваҕа”, “Алуэтка”, “Новичокка”. Дьокуускайдааҕы тыа хаһаайыстыбатын научнай-чинчийэр института таһаарбыт саҥа “Севернэй” суордун саҥа ыланнар кэтээн көрөн эрэллэр.

Нэһилиэк олохтоохторо үлэлииллэр уонна Арктикатааҕы Судаарыстыбаннай Агротехнологическай университет иккис кууруһун устудьуона Гаврил Васильев кэлэн үлэлэһэр. Өрөспүүбүлүкэ «Сири оҥоруу сулууспата» судаарыстыбаннай бүддьүөт тэрилтэтиттэн тыа хаһаайыстыбатын култуураларын суортарын үүннэрэн үөрэтии отделын начаалынньыга Александра Алексеева командировкаланан кэлэн көмөлөһө сылдьара.

Учаастак үлэтин тэрээһинигэр, хааччыллыытыгар үөһээҥи да тэрилтэлэрэ, нэһилиэк да дьаһалтата болҕомтолорун уураллар. Арассаада тэпэлииссэтэ эбии тутуллубута. 2020 сыллаахха “Сири оҥоруу сулууспата” 700 баҕананы уонна 50-нуу миэтэрэ уһуннаах 40 урулуон сиэккэни биэрэн, күрүөнү саҥардыы, учаастагы олорчу эргитии үлэтэ ыытыллан турар.

Маргарита Антонова хаартыскалара.

Аркадий Иннокентьев

«Эркээйи» хаһыат сайтыттан: https://xn--h1abcx8dca.xn--p1ai/article/60568

от adminNB

Добавить комментарий

Ваш адрес email не будет опубликован. Обязательные поля помечены *