Уус Амма нэһилиэгэр олорор, сылгы, сүөһү көрүүтүнэн дьарыктанар, элбэх оҕолоох дьиэ кэргэн ийэтэ Галина Варламова санаатын үллэстэр:
«Биһиги ыал аҕабыт Александр Алексеевич бааһынай хаһаайыстыба буолан үлэлээбитэ 10-ча сыл буолла. Билигин 60-ча төбө сүөһүнү кыстатан турабыт, төрүөх саҕаланна. Төрүөхтээх ынахтарбыт бары уулаахтар, билигин 8-с ынах төрөөбүтэ. Ньирэйдэр этэҥҥэлэр, өссө элбиэхпит. Бородуукта сыаната үрдүү турар кэмигэр, бэйэ хаһаайыстыбалаахпыт олус үчүгэй. Сибиэһэй үүт, үрүҥ ас, эт куруук баар. Хаһаайыстыбалаах буолар диэн «дохуот», билиҥҥи санкциялар киирбит кэмнэригэр ордук көдьүүстээх курдук.
Биэс оҕолоохпут, сиэннэрдээхпит. Бары улаатан, дьоҕус дэриэбинэттэн киин сиргэ таласпыттара. Арай иккис кыыс Галина Чымынаайыга олорор. Билэргит буолуо, өрөспүүбүлүкэҕэ дьахталларга 60 киилэҕэ мас-рестлинг көрүҥэр чөмпүйүөнкэ. Аҕабыт хаһаайыстыбатыгар көмө буолуо дуу диэн кыра кыыспыт Тыа хаһаайыстыбатын техникумугар, лаборант идэтигэр үөрэнэр.
Бэйэм 40-ча сыл тыа хаһаайыстыбатынан дьарыктанабын, ону тэҥэ оскуолаҕа үлэлиибин, «Баай — Ас» кэпэрэтиипкэ олохтоохтортон үүт-ас тутабын. «Баай — Ас» кэпэрэтиипкэ үүппүтүн кыһыны быһа туттардыбыт. Үүт собуотугар Марфа Афанасьевна Сидорова олус бэрткэ үлэлиир, ыабыт үүппүт хойуута 5 бырыһыаҥҥа тэҥнэһэр. Собуоппутугар үүт ас дэлэйин астыыр: суорат, кефир, сүөгэй, творог. Нэһилиэккэ атыыга тахсарын таһынан чугас улуустарга тиийэ атыыланар. Маны таһынан арыыбыт харчытын тутатына төлүүллэр.
Оттуур ходуһабыт баар эрээри, тиийиммэппит. Сылын аайы 500 устуука урулуон атыылаһабыт. Оттуур ходуһаларбыт дэлби дулҕа буолан ситэ оттоммоттор. Онон сирдэрбит оҥоһуллуохтарын наадатын улуус тыатын хаһаайыстыбатын салаатыгар биллэрбиппит, этии киллэрбиппит.
2016 сыллаахха тыа хаһаайыстыбатын граныгар кыттан 1 мөл. 400 солк. ылан Белорусь тыраахтар атыыласпыппыт. Иннэ диэн оппутугар-маспытыгар абыранныбыт. Ол эрээри билиҥҥи кэмҥэ тыа хаһаайыстыбатынан дьарыктаныы кэккэ уустуктардаах. Улуус кииниттэн ыраах сытар буоламмыт, ГСМ, саппаас чаас сыаната ыарахан, буларга да уустук.»
Елена Слепцова
«Эҥсиэли» хаһыат сайтыгар: https://xn--h1aaigu4ed.xn--p1ai/article/92386