Ньурба улууһун Өҥөлдьөтүгэр нэһилиэк туруу эр дьоно үрдүкү кылаас уолаттарын илдьэ муҥхалыы бара сырыттылар. Эбэҕэ киириэхтэн тахсыахха, муҥханы түһэрииттэн таһаарыыга диэри оҥоһуллар сиэри-туому кэпсээтилэр, хас биирдии оҕо бары үлэҕэ кыттыыны ылла.
Сэтинньи ый саҥата саха дьонун күүтэр-ахтар кэмэ. Айылҕа чуумпурар, бастакы хаар түһэр, түүҥҥү тоҥоруулар, күөл мууһа туруута кэтэһиилээх кэм. Өбүгэбит төрүт үгэһэ эппитигэр-хааммытыгар иҥпит тыа дьоно бу кэми бэркэ күүтэбит. Киһи өй-санаа өттүнэн сааһыланар, сынньанар кэмэ. Былыргы саха норуотун сээркээн сэһэнньиттэрэ этэллэринэн, “саха үстэн биирдээх”. Орто дойдуга кэлбит оҕо киһи буолар кэскиллээх: ону сатаан таба тайаныахха, чопчулаан, быһааран биэриэххэ дииллэр. Манна сытар саха норуотун үөрэтэр-иитэр кистэлэҥэ. Дьэ ону куоһур оҥостон, үрдүкү кылаас уолаттарын илдьэ Өҥөлдьө туруу эр дьоно олохтоох дьаһалта баһылыгын Павлов А.Н., оскуола директора Васильев С.В., учууталлар Иванов М.Н., Григорьев А.В., үлэһиттэр Максимов М.Г., Григорьев А.В., Иванов Ю.Н., специалист Семенов Д.И. биир кэрэ көстүүлээх Эмэкээйи диэн сиргэ муҥхалыы бара сырыттылар. Өбүгэ үөрэҕиттэн саҕалаан, үгэс буолбут муҥхалааһын түгэннэрин оҕолорго быһааран, көрдөрөн, бары ымпыгар-чымпыгар диэри быһаарсар үлэни кытылтан саҕалаан ыыттылар.
Балыктааһын көрүҥнэринэн сахалыы туттар тэриллэри үөрэтии, ааттарынан быһаарыы, муҥхаһыт оруолун үллэстии, төрүт дьарык буоларын билиһиннэрии барда. Муҥханы түһэрии бэйэтэ туспа сиэрдээх буоларын өйдөтүү ыытылынна.
Күөлгэ киириэхтэн тахсыахха, муҥханы түһэрииттэн таһаарыыга диэри оҥоһуллар сиэр-туом бары өттүнэн хас биирдии оҕоҕо тиэрдилиннэ, бары үлэтигэр кыттыыны ыллылар. Төһө да халлаан бүдүгүрэн турдар, дьону кытта сылдьан, бары үөрүйэххэ кыттыһан оҕолор санаалара бөҕөх, инникигэ эрэбил баар. Бу күҥҥэ кинилэр өбүгэ ситимин, үөрэҕин эттэригэр-хааннарыгар иҥэринэн, ыраас салгынынан толору тыынан, сырдык хаары оймоон, үөрэн-көтөн кэллилэр. Бу буолар дьиҥ сахалыы үөрэҕи оҕоҕо тиэрдии биир көрүҥэ.
Анна Никитина, Өҥөлдьө
Саха Медия сайтыттан: https://ulus.media/article/77424