Туох баар үүнээйи олордор киһи илиититтэн, сатабылыттан тутулуктаах диэн мээнэҕэ этиллибэтэх…
Хас биирдии оҕуруоччут бэйэтин билиитинэн, ылан кэлбит уопутугар, дьонтон ылбыт сүбэтигэр олоҕуран олордон үрдүк үүнүүнү ылары ситиһэрэ саарбаҕа суох. Ол курдук бассаап ситимигэр бэйэтин уопутун сүрдээх үчүгэйдик кэпсиир Мария опытыттан кэпсиэхпин баҕардым.
Сиэмэни тохсунньуттан саҕалыыр, сылаас буолан таһардьа тахсарыгар астанан тахсар эбит.
Сиэмэтин атын дьон буор үрдүгэр хаар кутан ыһар буоллаҕына, кини сиэмэтин атыылаһаат, пакеттарын 5 күн морозильникка угар эбит онтон ылаат да көпсөркөй, хара буорга ыһар эбит.
Таһардьа хортуоска үүнэр кыра кумахтаах, хара буордаах буорга олордор эбит. Бастаан үүннэрэригэр Вертера Гумин убаҕас, бытыылкалаах эбии аһылыгы, уоҕурдууну суурайан кутуталыыр уонна сайын устата аһаппаппын диир.
Хайдах кыстыыллар, көрөҕүн харайаҕын диэн ыйытыыга бастакы сылбар лутрасилынан сабан кыстаппытым хаар анныгар, онтон 2-3 сылларыттан аҥардас хаар анныгар кыстыыллар, саас үчүгэйдик быган тахсаллар. Кыстыырыгар сэбирдэхтэрин үргээбэт, арай сиппэтэх, күһүн хойукка диэри үүнэ сатыыр туох да буолунай астарын хомуйан уулаах вазаҕа букет курдук уурар, онто ситэн түргэнник буһар эбит.
Ити сиппэтэх астарын тонооботоххо кыаҕын барытын онно ыытан кэбиһэр. Үүнээйи барыта кыстыкка эмиэ бэлэмнэнэр ол иһин итинник хомуллар.
Сэбирдэхтэрэ саба түһэн силиһин тымныыттан харыстыыллар, устунан хаар түһэр, ол оннук кыстыыллар. Саас ол отторо күөх сытар буолаллар, онтон хаталлар ону ыраастаан кэбиһэбин, хаар ууллубутун кэннэ син тымныы, тоҥоруу бөҕө буолар дии онтон харыстаан лутрасилынан сабабын. Саас үүнээйилэрэ быктахтарына Вертера Гумин убаҕас эбии аһылыгы, уоҕурдууну суурайан кутан аһатар.
Күһүн кыстыы хааларыгар буора сииктээх буолуохтаах ол силиһэ үчүгэйдик кыстыырыгар көмөлөһөр.
Ханнык көрүҥҥэри сөбүлээн үүннэрэҕин диэн ыйытыыга дьэдьэннэртэн Александрина, Ксюша, Барон Солемахер, Руяна уонна араҥас дьэдьэн. Балар астара тыа дьэдьэнин курдук минньигэстэр, дьэдьэн буорун састаабыгар туга эрэ тиийбэт буоллаҕына эрэ аһын амтана мөлтөх буолар. Сайын тымныы, былыттаах күннэргэ буоругар кыра саахардаах уу куттахха амтана лаппа тупсар, ардахтаах күҥҥэ маннык албаһы туттуохха сөп.
Клубникалартан Московский деликатес аһа бөдөҥ, дэлэй, биһиги климаппытыгар кыстыыр.
Александринаны 4 сыл кэннэ саҥардабын, Московский деликатес 5 сыллара.
Сороҕун үлүтэн кэбиспитим, төттөрү-таары буоруттан ороон теплицаҕа үүннэрэ сылдьан сатаан ылсыбаккалар кыстаабатахтара. Хаандыга диэн ааттыыр бытыга суох клубниканы былырыын боруобалаан үүннэрбитим.
Хайа баҕарар үүнээйи киһи илиититтэн, сатабылыттан олус тутулуктаах, саҥа үүннэрээччилэргэ бэртээхэй сүбэлэр.
Марина Ордахова
«Таатта» хаһыат сайтыгар кулун тутар 10 к.: https://xn--80aaa3eca.xn--p1ai/article/92035