Тыа хаһаайыстыбатынан дьарыктаныан баҕалаах дьоҥҥо хаһаайыстыбаларын тэринэн үлэлэрин саҕалыылларыгар бэриллэр «Агростартап» грана биһирэбили ылан, ити көмө үбү ылыы куонкуруһугар сыл аайы кытталлар.
Былырыыҥҥы куонкуруска өрөспүүбүлүкэ үрдүнэн 118 кыттаааччыттан 22 оройуонтан 38 киһи бу граны ылары ситиспиттэрэ. Ол иһигэр, Мэҥэ Хаҥалас улууһуттан үс киһи ылбытыттан иккитэ Мөҥүрүөн нэһилиэгиттэн.
Нөөрүктээйи нэһилиэгиттэн 2 мөлүйүөн 444 тыһыынча солкуобай суумалаах граны Михаил Павлов ылан турар. Бу күннэргэ ол көмө үбүн туһаҕа таһааран бүтэрэрэ чугаһаан сылдьар. Биисинэс-былааныгар ыйыллыбытынан саҥа «МТЗ-82» тыраахтары, оту урулуоннуур тэрили уонна икки уулаах тиҥэһэни атыыласпыт. Өссө үс сүөһүнү ылыахтааҕын этэр.
‒ Барыта 30 сүөһүлээхпит, ‒ диир грантовик. ‒ Ыанарбыт 11 ынах. 11 торбостоохпут. Аҕыс тиҥэһэ баар. Сүөһүлэр икки эргэ хотоҥҥо тураллар. Быйыл саҥа хотон туттар былааннаахпын. Хайдах хотон буолар, билиҥҥитэ быһаара иликпин.
Михаил Андреевичтаах үс сиринэн оттууллар эбит. Павловскай бөһүөлэгин чугаһынан 14 гаалаах ходуһалаахтар. Хаптаҕай диэки 10-ча гаалаахтар. Аллараа Бэстээхтэн Майаҕа айаннааһыҥҥа тыраасса кытыытыгар 17-с килэмиэтиргэ 22 гаалаах ходуһаҕа оттуу сылдьаллара ааһан истэххэ көстөр буолааччы. Оттуулларыгар, дьиэ хаһаайыстыбатын атын үлэлэригэр үс «Синтайдарын» туһаналлар. Эмиэ онуоха сөптөөх урулуоннуур тэриллээхтэр. Кыра урулуонунан 40-тан тахса туонна оту оттообуттар. Ото тиийбэт буолан, эбии атыылаһар санаалаах. Үүттэрин туттараллар. Ыйга 3 туонна үүт тахсар диир. Туттарыыларын былаанын толорбуттар.
Михаил идэтинэн биэлсэр. Кэргэнэ, Павловскай балыыһатыгар үлэлиир терапевт идэлээх Таисия Руслановналыын 3 оҕолоохтор: үһүс уонна маҥнайгы кылаастар үөрэнээччилэрэ, кыралара уон ыйдаах. Михаил Павлов араас үлэлэргэ үлэлээбитин этэр. Идэтинэн да, баахтаҕа да үлэлии сылдьыбыт, тимир суол тутуутугар үлэлэспит.
Сүөһүтүн элбэтэн, саҥа хотон туттан, саҥа улахан тыраахтарынан оттууругар олохтоох дьаһалтаттан сир көрдөһөн көрөр санаалааҕын эппитэ.
источник: Улус медиа. Сайт Минсельхоза РС (Я)