Тыа хаһаайыстыбатын министиэристибэтин иһинэн дьоҕус киэптээх хаһаайыстыбалары уонна тыа хаһаайыстыбатын кэпэрэтииптэрин кытта үлэни сүрүннүүр Айаал Тимофеев иһитиннэрэринэн, быстах хомуурга бааһынай хаһаайыстыбалаах дьонтон 8 киһи ыҥырыллан барбыт, оттон сулууспалыы барбыттар ортолоругар кэпэрэтиип салайааччыта сололоох киһи суох.
Урбаанньыт-пиэримэрдэртэн граннаахтара соҕотох. Кини – Николай Игнатьев, Таатта Кыйытын олохтооҕо. Николай 2019 с. “Агростартап” куонкуруска киирсэн кыайбыт. Эти оҥоруу хайысхатыгар бырайыак оҥорон көмүскээбитигэр 4 мөл. солкуобай кээмэйдээх көмө үбү биэрбиттэр. Ол үбүнэн ыччат сүөһү атыыласпыт уонна хотон туттубут. Бааһынай 30-тан тахса сүөһүтүн кыстыкка киллэрэрэ бу кэлбитигэр бэбиэскэ туппут. Ону, хата, министиэристибэттэн Айаал Ивановичтаах үлэлэһэн, хаһаайыстыба баайын быстах кэмҥэ олохтоох “Кыйы” ТХПК кыстата ылла.
Оттон Мэҥэ Хаҥалас улууһун 2-с Наахара нэһилиэгэр Хочоҕо олохтооҕо Вячеслав Соколов сүөһүтүн дьылҕата быһаарылла илик. Вячеслав 2018 с. “Саҕалааччы пиэримэр” гранын – 3 мөл. солкуобайы ылан, ынах сүөһү иитэр хаһаайыстыбатын сайыннаран испитэ. Кини ылбыт граныгар отчуоттаан бүтэн, эппиэтинэстэн төлөрүйбүт эбит. “Итии туочукаҕа” сулууспалаабыт буолан, быстах хомуурга биир бастакынан хабыллыбыт. Сүөһүтүн кэргэнигэр хаалларбыт. Кэргэнэ оҕо саадыгар үлэлээх, хаһаайыстыбаҕа эмиэ хамнас аҥаарыгар үлэһитинэн сылдьар.
Улуустааҕы тыа хаһаайыстыбатын салалтатын бааһынай хаһаайыстыбалары кытта үлэлэһэр исписэлиис Ньургуйаана Семенова этэринэн, Вячеслав кэргэнэ 30-тан тахса сүөһүнү соҕотоҕун көрөрө кыайтарбат буолан, сарбыйар санаалаах үһү. Вячеслав – хочолорго күтүөт, кэлии киһи. Онон хаһаайыстыбаҕа көмөлөһүөх айылаах аймах-той чугаһынан суох. Хаарыан сүөһүлэр эмиэ идэһэ кэккэтин хаҥатыах муҥнара буоллаҕа.
Манна эбэн суруйдахха, Мэҥэ Хаҥалас улууһугар тыа хаһаайыстыбатыгар быһаччы үлэлии сылдьааччылартан барыта 5 киһи хомуурга хабыллыбытыттан түөртэрэ барбыттар. Бүгүн-сарсын сэрии уотугар киирэргэ бэлэмнэнэр Вячеслав Соколову сэргэ “Хорообут” ХЭУо сылгыһыта, “Хоту” ТХПК суоппара, “Боччуо” бааһынай хаһаайыстыба (3-с Мэлдьэхси, Томтор) үлэһитэ суох хааллылар.
Источник: UlusMedia