Улуус дьаһалтата (баһылык Анатолий Григорьев) уонна тыа хаһаайыстыбатын управлениета (салайааччы Владимир Анисимов) Элгээйи уонна Тойбохой куусталарынан нэһилиэк баһылыктарын, тыа хаһаайыстыбатынан дьарыктанар тэриллиилээх хаһаайыстыбалар салайааччыларын, биирдиилээн аһы-үөлү оҥорон таһаарааччылары кытары көрүстүлэр, элбэх олохтоох кэпсэтии барда.

Улууспут баһылыга Анатолий Григорьев дойдуга буола турар быһыыларынан сибээстээн экэниэмикэҕэ уустуктар тахсан эрэллэр, дьон бородууктаны хаһаанан долгуйуу буола сыста. Ону биһиги бэйэбит өттүбүтүттэн нэһилиэнньэни аһынан-үөлүнэн, күннээҕи туттар табаардарынан хааччыйар атыы-эргиэн кииннэрин — ИП Гуляев, “Корона”, “Татыйыына” салалтатын кытары кэпсэтэммит боппуруос быһаарылынна диир. Билиҥҥи туругунан Сунтаар улууһугар үс ыйга тиийэр бородуукта баар уонна ону таһынан суол сабыллыан иннинэ эбии кэлиэхтээх.

Улуус экэнэмиичэскэй сайдыыга управлениетын сүрүннүүр исписэлииһэ Саргылана Тихонова

улуус үрдүнэн 566 урбаанньыт баар, олортон 148 бородуукта маҕаһыына диэн билиһиннэрдэ. 14 килиэп астыыр бэкээринэ үлэлиир. Билиҥҥи туругунан 1500 туонна бородуукта баар уонна өссө эбии кэлэн иһэрин, сыананы кэтээн көрөөһүҥҥэ “Тарифнай агенство” тэриллибитин, Сунтаар улууһугар

экспиэринэн Тимур Иванов үлэлии сылдьарын туһунан иһитиннэрии оҥордо.

Улууска туризмы сайыннарыыга үөрэхтээһин ыытыллыаҕа, ону таһынан бэйэ дьарыктаах дьоҥҥо көмө, өйөбүл оҥоһуллуо, дьону үөрэтии барыа диэбитин дьон сэргии иһиттэ.

Улуус социальнай боппуруостарыгар исписэлиис Надежда Седалищева эмиэ бу хайысханан нэһилиэнньэни, дьиэ кэргэни өйүүр бырайыактар, дьаһаллар тустарынан билиһиннэрдэ.

Тыа хаһаайыстыбатын управлениетын салайааччыта Владимир Анисимов улууска 6 бырагыраама үлэлиирин эттэ, ону таһынан тыа хаһаайыстыбатын министиэристибэтэ эмиэ туспа бырагыраамалардааҕын билиһиннэрдэ.

Быйыл улууска сибиинньэ аҕалан түҥэтиэхтэрэ. Онно биир төбө сибиинньэ, кормикорм сыаналарын 50% улуус уйунар диэн эттэ. «Новай» сопхуоска 2500 куурусса сакаастанан турар, суолун харчытын эмиэ улуус уйунуоҕа. Ону таһынан сиэмэ хортуоска кэлэн атыыланыаҕа, айанын үбүн улуус уйунар.

Новосибирскай куораттан комбикорм оҥорон таһаарар оборудованиены сакаастаан Тойбохой нэһилиэгэр Алексей Сидоров аҕалан, комбикорм собуотун үлэлэтиэхтээх. Бу манна сүөһү эрэ аһылыгын буолбакка, кууруссаҕа, сибиинньэҕэ эмиэ оҥоһуллуоҕа. Сайыҥҥы суолунан Ленскэйинэн кэлэн алтынньыга үлэҕэ киирэрэ былааннанар.

Станислав Семенов өр сыллаах оту ыһар тиэхиньикэ ылан сайаапка быһыытынан улууһу бүтүннүү хааччыйара күүтүллэр.

Бүлүүчээн нэһилиэгэр олорор Андрей Максимов индюк иитэр, бу дьыалатын кэҥэтэр санаалаах.

Дьэ маннык дьаһанан, биһиги дьоммут, ханнык да санкцияҕа ыктарбакка, нэһилиэнньэни бэйэ олохтоох аһылыгынан хааччыйарга үлэлэһэллэр. Кинилэргэ сөптөөх өйөбүл баар буоллаҕына, сайдан, кэҥээн иһиэхтэрэ турдаҕа.

Аҥаардас урбаанньыттар, тэриллиилээх хаһаайыстыбалар эрэ буолбакка, чааһынай биирдиилээн ыаллар мунньахха кыттан эмиэ бэйэлэрин санааларын-оноолорун этиннилэр. Холобур, Уһун Күөл нэһилиэгэр олорор 1-кы группалаах инбэлиит Лилия Попова араас дойдулартан индюк сымыытын сакаастаан ылан иитэр, ону сэргэ дьоҥҥо тарҕатар эбит. Бу көтөр олус иҥэмтиэлээх эттээҕин, үчүгэй аһылыкка турдаҕына биир индюк 20-тэн тахса киилэ буоларын хайҕаан кэпсээтэ. Бу дьарыкпын өссө сайыннарыахпын баҕарабын, чоппууска таһаарар инкубатор атыылаһыам этэ, манна улуус, тыа хаһаайыстыбатын өттүттэн көмө баар буолуо диэн ыйытта. Кини тэпилииссэҕэ клубника олордор эбит. Сорҕотун таһырдьа эмиэ үүннэрэбин. Онтум кыайан ас биэрбэт, үксүн тураах, чыычаах аһылыга буолар диэн кэпсиир. Ол да буоллар, мин оҕо эрдэхпиттэн үлэҕэ сыстаҕаспын, кыайбаппын, сатаммат диэн санаабын олох түһэрбэппин диир. Онон билигин киһи баҕалаах, сүрэхтээх буоллар эрэ тугу баҕарар кыайар кыахтаах диэн кэпсэтиитин түмүктээтэ.

Мунньах түмүгүнэн, Анатолий Григорьев нэһилиэнньэ олус көхтөөхтүк кыттыбытын бэлиэтиир. Билигин бэйэбитин бэйэбит хааччынар кэммит кэллэ. Үлэ үөрүйэхтэригэр оҕону эрдэттэн сыһыаран, үөрэтэр бириэмэ билигин. Онон бары оскуолалар кыра да буоллар хаһаайыстыбалах буолалларыгар үлэлэһэбит, сайыҥҥы өттүгэр үлэ лааҕырдарын тэрийиини сөргүтүөххэ наадатын эттэ.

Валентина Архипова, Яина Власьева

«Улус Медия» 24.03.2022 г.: https://ulus.media/article/47611

От adminNB

Добавить комментарий

Ваш адрес email не будет опубликован. Обязательные поля помечены *