Сииттэ нэһилиэгин дьоно-сэргэтэ рынок кэмэ туруоҕуттан, бэйэ олордубут оҕуруот аһа ордук битэмииннээҕин, айылҕа бэрсэр сир аһа туһалааҕын, хороҕор муостаах үрүҥ илгэтин, бэйэ кууруссатын көрөн — истэн, сүөһүнү, сылгыны иитэн, дойдубут курулас күөллэригэр илимнээн көмүс хатырыктааҕы хоторон, сибиинньэ этин тото — хана ыһан, үргээн, сиэн — аһаан, дьаһанан олороллоруттан киьи үөрэр эрэ.
Билигин хас биирдии хаһаайка дьиэтин таһыгар араас, көрүөхтэн кэрэ сибэкки эгэлгэтин, оҕурсуу, помидор, хаппыыста, хортуоска курдук оҕуруот астарын өлгөмнүк ыһан хаһаанар буоллулар. Атын оҕуруот аһын киһи этэ да барбат. Онон түбэһиннэрэн ситим нөҥүө «Мин кыһыҥҥы хаһааһым…» диэн сылын аайы ыытыллар күрэх буолан бүттэ.
Манна олохтоохтор айылҕаҕа түспүт хаартыска арааһын ыытан дьон — сэргэ болҕомтотун улаханнык тардаллар. Сииттэбит хаһаайкаларыгар анаан араас рецептары атастаһыы группата, ону таһынан атыы — эргиэн, астан саҕалаан таҥаска — сапка тиийэ, күннээҕи наадалааххын булар ситимҥэ араас белөхтөр баалларыгар махталларын тиэрдэллэр.
Билигин сибиэһэй хаппыыстаны атыыга 1 киилэтин 40 солк. «Дайаана» ИП Николаева Софья Денисовна маҕаһыыныгар бар дьонугар таһаарда. Быйылгы сыл төһө да ыарахаттардаах буоллар, кыахтарынан син оттоон — мастаан, улууспут уонна олохтоох дьаһалталарын көмөлөрүнэн кыстыгы этэҥҥэ туоруур инибит диэн эрэл баар дии саныыбыт. Хортуоска — иккис килиэп диэн мээнэҕэ эппэтэхтэрэ, быйыл иһиттэххэ дьон уурар да сирбит суох дииллэрин истэн киһи сүргэтэ көтөҕүллэр. Онон ханнык да ыарахаттартан толлубакка Сииттэбит нэһилиэгин олохтоохторо былырыыҥҥы да ыарахан кыстыгы атаарбыппыт, быйылгы да кыстыгы биир сомоҕо буоллахпытына этэҥҥэ кыстыахпыт диэн эрэли баҕарыллар. Инники да өттүгэр Кэбээйибит улууьун баһылыга Иван Левин, олохтоох баһылык Семён Тимофеев, улууспут тыатын хаһаайыстыбатын салалтатыгар уонна республикабыт бырабыыталыстыбата болҕомто ууралларыгар махталбытын тиэрдэбит!
Марианна Сивцева
Дабаан (Восхождение) хаһыат сайтыгар: https://xn--80aaacn2d.xn--p1ai/article/71176