Тыа хаһаайыстыбатын күнүгэр аҥардас фермердары эрэ буолбакка, улууска тыа хаһаайыстыбатын сайыннарыыга үлэлэһэр агрохайысхалаах оскуолалары эмиэ саныах тустаахпыт. Горнай оройуонугар Маалтааны, Күөрэлээх, Одуну, Мытаах, Атамай оскуолалара агрохайысханы талан, оҕолору аҥардас билиини эрэ биэриинэн муҥурдаммакка, үлэҕэ, тыа хаһаайыстыбатыгар сыһыарыыга үлэлэһэллэр.
Сылын аайы күһүн агрооскуолалар нэһилиэнньэҕэ бэйэлэрэ олордубут оҕуруот аһын эгэлгэтин атыылаан, быыстапкалаан дьон махталын ылыан ылаллар.
Бүгүн бу хайысханан үлэлиир В.Лонгинов аатынан Атамай орто оскуолатын дириэктэрин Мотрена Ефремованы кытта кэпсэттибит, санаатын иһиттибит:
— Агрохайысханан оскуолалар сайдыылаах куораттарга олус таһаарыылаахтык үлэлииллэр. Республикабытыгар тыа хаһаайыстыбатын эйгэтэ сайдыан наада. Соҕуруу улахан агрохолдиннар, тыа хаһаайыстыбатын бородууксуйатын оҥорон таһаарар улахан тэрилтэлэр баар буолан, агрохайысхалаах оскуолалар кинилэр баазаларыгар оҕолору үөрэтэллэр. Сайынын ол тэрилтэ оҕолору үлэҕэ ылан, толору хамнастыыр.
Биһиэхэ аныгылыы технологиялаах хаһаайыстыбалар суох буолан, итинник үлэлэһэр кыаллыбат. Билигин хотоҥҥо үлэлиир кырдьаҕас дьон оҕолору кытта бадьыыстаһыахтарын баҕарбаттар, күннээҕи үлэттэн да ордубаттар.
Бэйэбит оскуолабыт туһунан эттэххэ, билиҥҥитэ 28 ынах, 10 сылгы тутабыт. Учуутал эр дьоммут сайын аайы эбээһинэс ылынан, уочаратынан оттууллар. Быйыл 31 туонна 200 оту оттоотубут. Учуутал күнүгэр үлэһиттэргэ, ветеран учууталларга биир сүөһүнү туттааччыбыт, нэһилиэнньэҕэ атыылаан эбии дохуоттанабыт. Оҕолорго сиэппэппит, санпин өттүнэн ирдэбил кытаанах. Бойняҕа идэһэлэммит буолуохтаах. Улууска биир эрэ поставщик Иван Ксенофонтовтан аһылыкка ылабыт. Нэһилиэктэргэ бойня оҥоһуллара буоллар олус үчүгэй буолуо этэ.
2013 сылга диэри Тыа хаһаайыстыбатын министиэристибэтэ куонкурус быһыытынан 500 000 солк. диэри көрөрө. Ол саҕана куонкуруска кыттан «Синтай» тыраахтар, рулонник ылан турабыт. Ол иһин билигин толору механизированнай оттуубут.
Билигин агрооскуолаларга материальнай-техническай өттүгэр көмө суох. Дьиҥэ бу өттүнэн сайдарбыт буоллар, оҕолору даҕаны сыһыарыыга ордук буолуо этэ. Оҕолору бу хайысхаҕа сыһыарарга аныгылыы, инновационнай хотон, теплица наада. Былыргы хотонтон билигин бары куота сылдьаллар, манна үлэлиэхтэрин баҕарбаттар. Урукку кэмтэн уларыйыы, сайдыы суоҕун кэриэтэ.
Оскуола иһинэн олордубут оҕуруоппут аһын, сүөһүбүт этин бэйэбит туһанарбыт буоллар эмиэ олус көмөлөөх уонна туһалаах буолуо этэ. Маныаха, «Горнай-Ас», «Горныймясопродукт» курдук тэрилтэлэрбитигэр сыһыаран, уопсай хранилище оҥорон, ирдэбилгэ эппиэттиир буоллахпытына агрооскуолалар дьэ көдьүүстээхтик үлэлиибит диэхпит этэ.
Инникитин дьоҕус аныгылыы «өйдөөх» теплица туттуохпутун баҕарабыт, «Саюри» курдук. Сыл устата бэйэбит «күөхпүтүн» сиир дэлэлээх үчүгэй буолуо этэй!
«Улус Медия» сайтыттан: https://ulus.media/article/74422