2022 сыл муус устар 7 күнүгэр Хаҥалас улууһун Өктөм нэһилиэгэр Чаппаай сэл. СӨ Бастакы Президенын Бибилитиэкэ — архыыбыгар (Николаев Центр) Хаҥалас улууһун фермердарын Ассоциацияларын бэрэссэдээтэлэ Розалия Петрова этиитинэн СӨ Тыа Хаһаайыстыбатын Министерствотын, Хаҥалас улууһун администрациятын, Туймаада Агрохолдинг, Алмазэргиэнбанк специалистара Хаҥалас улууһун фермердарын кытта көрүстүлэр.
Хаҥалас улууһун баһылыгын солбуйааччы Николай Иванов, СӨ Тыа Хаһаайыстыбатын Министерствотын миниистири солбуйааччы Прокопий Николаев, Розалия Петрова киирии тыллара уонна Фермердар Ассоциацияларын чилиэттэригэр чилиэн каартатын уонна бэлиэни туттарыы.
Кэпсэтии фермердар этиилэригэр тута хоруйдааһын бэрээдэгинэн ааста.
СӨ ТХМ-тан Айал Тимофеев, Вера Тимофеева, Иван Артамонов, Анна Малышева кытыннылар.
Степан Ильин 2021 сыллаах «Агростартап» күрэх кыайыылаахтара көрсүбүт күчүмэҕэйдэрин кэпсээтэ. Кини олус элбэх отчуот ирдэнэрин, сыана ыарыы турарынан сибээстээн грант харчыта тиийимиэн синин, «Электроннай бүтсүөт» систематыгар киирии олус ыараханын, харчыны бу саҕардыы муус устар ыйга туппутун сырдатта.
СӨ ТХМ специалистара ыйытыыларга хоруйдаатылар. Айал Тимофеев быйылгы уларыйыылары эттэ — сыана үрдүү турарынан «Агростартап» кыайыылааҕа харчытын туһаныытын уларытыан син буолла, ол гынан баран грант суммата уларыйбат, уонна быйыл «Электроннай бүтсүөт» буолбакка грант харчыта фермер баанын счетугар киирэр буолла.
Мэччирэҥ боппуруоһа Өктөм нэһилиэгэр уруккаттан сытыырхайбыта биллэр. Урут субай сүөһүнү саас үөһэ алаастарга таһаарар этибит дииллэр.
Сергей Латышев син аһын үүннэриитин боппуруостарын эттэ. Техника эргэриитэ, техниканы лизинг систематынан ылыы, олордор сиэмэ боппуруостарын туруоруста уонна сүрүн боппуруос — үүнүүнү атыылааһын, батарыы буоларын тоһоҕолоон эттэ.
Акулина Львова сайылыктары саҥардыы боппуруоһун туруорда. Онно «Туймаада» Агрохолдинг специалистара эппиэттээтилэр. 5 бырыһыаннаах займ өҥөтө баарын кэпсээтилэр. Уонна скороспелай көрүҥнэрин сайдыытын баһаатынан 550 төбө сибииннбэни көрүүгэ биэрэллэрин, уонна сибиинньэ атыыга баарын кэпсээтилэр. Эбиитин Агрохолдинг субай сүөһүнү көрүүгэ биэрэр программатын сырдаттылар. Быйылгы кириизис семейнай экономикаҕа туһаайыылаах миэрэлэрэ өссө быһаарылла илик эбит.
Акулина Уваровская быйылгы «Агростартап» куонкуруска бэлэмнэнии боппуруоһун туруорда. Николай Иванов этэринэн улууска анал үөрэххэ 20 эрэ киһи кыттыбыт эбит… СӨ Министерствотын иһинэн анал тэрилтэ баарынан Дьокуускайга министерство дьиэтигэр 217 кабинетка кэлэн ыйыталаһыҥ диэн сүбэ биэрилиннэ.
Евдокия Денисова районированнай бурдук сиэмэтин уонна үүннэрбит бородууксуйаны батарыы боппуруостарын туруоруста.
Хахсык СХПК салайааччыта Тамара Осипова техника атыылаһыытыгар көмө уонна эдэр специалистарга субсидия боппуруостарын ыйытта. Техника ылыыга аны билигин потребкооператив буоллахха 50 бырыһыан возмещение кэлиэн син эбит, уонна эдэр специалистар аан бастаан үлэҕэ киирэр буоллахтарына эрэ субсидия көрүллэр эбит.
Эркээни хочотугар уруккаттан сытыырхайбыт сүөһү өлөрөр сыах боппуруоһун Екатерина Дороманова туруоруста. Ону эмиэ потребкооперация быһыытынан боруобаланан көрүҥ диэн сүбэ этилиннэ. Улуус уруккаттан туруорсар боппуруоһа, онон хаттаан үөрэтиэхпит диэтэ Николай Иванов.
«Алмазэргиэнбанк» бэрэстэбиитэлэ баан Арассыыйа ТХМ программаларыгар Россельхозбанк курдук кыттарын сырдатта. 5 бырыһыаннаах кредит биэриэхпитин син диэтэ. СӨ Ил Дархана Айсен Николаев этиитинэн баан хаппытаалын эбиллиитэ аны сайын ортотугар түмүктэниэ диэн кэпсээтэ.
Түмүк тылы Розалия Петрова эттэ.
Уопсай хаартыскаҕа түһүү буолла.
Олус туһалаах, фермердарга сэргэхсэбиллээх көрсүһүү буолан ааста. Коронавирус пандемията кыратык уостан хаттаан уун утары олорон фермердар ТХМ, тустаах тэрилтэлэр уонна улуус специалистарын кытта кэпсэттилэр.
СӨ ТХМ специалистара соторутааҕыта ыаллыы Мэҥэ-Хаҥалас улууһугар тахсан көрсүһүү тэрийбиттэрэ. Онон итинник фермердарга, уо.д.а тыа хаһаайыстыбатын үлэһиттэригэр балаһыанньаны быһаараллара олус үчүгэй.
СӨ ТХМ миниистрин солбуйааччыга Прокопий Николаевка көрсүһүүгэ кыттыбытын иһин махтал!
«Туймаада» Агрохолдинг үлэлии турар программаларын сырдатар үлэтин күүһүрдиэн наадата билиннэ. Лимит өссө баарынан сибээстээн Агрохолдинг тустаах специалистарыгар сибээстэһиэххитин син.
Хортуоппуй уо.д.а. оҕуруот аһын сиэмэлэрэ, сир аһын ыһар хонуулары кэҥэтии, техниканнан, сапчаастарынан хааччыйыы боппуруостара мантан антах сытыырхайаллара фермердар этиилэриттэн билиннэ. Онон СӨ салалтата, СӨ тыа хаһаайыстыбатын министерствота федеральнай былааска көмө биэриитин уонна сокуон, быраабыла уларытыыларын туруорсаллара олус наада буолла.
Хаҥалас улууһун салалтата нэһилиэктэрин, нэһилиэнньэни кытта үлэтин күүһүрдүөн наада. Фермердар бастаан утаа ыйытыктарын улуус таһымыгар ырытыахтарын наада. Улуус салалтата, тыа хаһаайыстыбатын департамена нэһилиэктэр, урбаанньыктар, фермердар, СХПК-лар үлэлэрин түмэн, биир тылга киллэрэрэ бу кэмнэргэ олус наада.
Бүтэһигэр, фермердарга, тыа хаһаайыстыбатын үлэһиттэригэр этиим — эһиги бу билиҥҥи кэмнэргэ норуоппут кэскилин түстүүр, дьону-соргуну аһылыгынан хааччыйар оруолгут тыын боппуруос буолла.
Николаев киинэ — СӨ Бастакы Президенын Бибилэтиэкэ- архыып салайааччытыгар Юрий Семеновка тэрийэр үлэтин иһин барҕаа махтал!
Николаев киинэ Хаҥалас улууһун, өрөспүүбүлүкэ бүттүүнүн түмэр, дьон түмсэр киинэ буоларын Михаил Ефимович Николаев туруорсар сыала.