https://ulus.media/2021/01/25/gornajga-sibiinne-kuurussa-brojler-choppuuska-atyylastahhyna-40-subsidiyalanya/ 2021 с. тохсунньу 25 к.
Ахсынньыга Горнай улууһун экономика управлениетын исписэлиистэрэ Намҥа оробуочай сырыынан бара сырыттылар. Нам улууһугар пандемия саҕаланыаҕыттан дьиэ кэргэн экономикатын өйөөһүҥҥэ анал бырагыраама үлэлиир. Горнай улууһун дьаһалтатын исписэлиистэрэ бу бырагыраама үлэтин сиһилии билистилэр, уопут атастастылар.
Мария Максимова, экономика салаатын исписэлииһэ: − Пандемия кэмигэр экономика чахчы айгыраата. Нэһилиэнньэ дохуоттаах буоларын ситиһээри Намнар үтүө уопуттарын олоххо киллэрэр соруктаахпыт. Сүрүн сыалбыт диэн нэһилиэнньэ дохуоттаах буолуута уонна бэйэ бородуксууйатынан хааччыныыны ситиһии буолар. Тыа хаһаайыстыбатын бырагырааматын чэрчитинэн дьиэ кэргэн экономикатын сайыннарыыга бүддьүөттэн үп көрүллүөҕэ. Сибиинньэ оҕотугар, кууруссаҕа, бройлер чоппуускаҕа сайаапкалары олохтоох дьаһалталар хомуйуохтара. Үчүгэйэ диэн бу бырагыраамаҕа бааһынай хаһаайыстыбаттан, элбэх оҕолооҕуттан, урбаанньытыттан тутулуга суох ким баҕарар кыттыан сөп.
Бэйэҕит харчыгытынан атыылаһан баран, квитанцияҕытын көрдөрөн, олохтоох дьаһалтаны кытта дуогабар түһэрсэҕит. Онтон субсидия быһыытынан 40 % төлөнөр. Ити дьиэ кыылларыгар дьонтон сайаапка хомуллубутун кэннэ тустаах тэрилтэни кытта дуогабардаһан, миэстэтигэр аҕалан бириэхтэрэ. Бройлер чоппууска 57 күнүнэн үс киилэттэн тахса ыйааһыны эбэр. Ону таhынан биир куул уотурба куурусса, сибииньэ ылбыттарга эмиэ субсидияланыа. Онон улуус дьаһалтата дьиэ кэргэн экономикатын сайыннарыыга саҥа сылтан саҕалаан улахан болҕомтотун ууран үлэлэһиэ. Горнай улууһун олохтоохторо дьоҕус хаһаайыстыба тэринэн куурусса, сибиинньэ, бройлер чоппууска ииттинэн дьиэ кэргэҥҥит эбии дохуоттаах буоларыгар үлэлэһиҥ.
Бэлэмнээтэ Алена Санникова