Таатта нэһилиэгин ытык ыала, Саха Өрөспүүбүлүкэтин «Семейная доблесть» хаһаайыттара Тамара, Афанасий Бояровтарга ыалдьыттаан, «дьэ кырдьык биһиги да сирбитигэр тыква үүнэр эбит” дии санаатым.
“Ыам ыйын саҥатыгар рассадалаан таһаарбын, ыам ыйын бүтэһигэр, бэс ыйын саҥатыгар тымныы түүннэр аастахтарына биирдэ олордобун. Сиэмэтэ улахан, ууга илитэн баран 1,5 см курдук дириҥнээх буорга анньабын. Буорбун элбэх органикалаах, ол эбэтэр от тобоҕун, помидор, хаппыыста сэбирдэхтэринэн уонна саас кыра хара буор кутан оҥоробун. Олус түргэнник ситэр, күнү сөбүлүүр. Уһун умнастаах тыкваҕа биир улаханы хаалларар ордук.
Ол астаах умнаһы 7-8 сэбирдэх кэнниттэн быһабын уонна эмиэ күн аайы көрө сылдьан хоннохтуубун, биир салааны ыытабын. Тыква син биир уруулуу үүнээйилэрин курдук тыһы, атыыр сибэккилэрдээх. Сарсыарда кэрийэ сылдьан көрөн атыыр сибэкки пыльцатын тыһы астаах сибэкки соҕуоччугар (пестигэр) сыбаан тиксиһиннэрэбин (опыляйдыыбын). Быйылгы бастакы тыквам 24,5 киилэ буолла. Олус диэн үөрдүбүт, соһуйдубут. Тыкваны күһүн биирдэ аһын быһыллар. Таһырдьа уга үлүйбүтүн да иһин улаханнык тымныыга хаарыттарбат. Сиппит тыква тас өҥө суордуттан көрөн араас өҥнөнөр, хаҕа кытаатар, ис өттө оранжевай кытархайдыҥы буолар. Тыкваны арааһынайдаан сиибит, хааһы да, хомпуот да, арааһынай бүлүүдэлэргэ кутабыт, сөбүлээн сиибит», диэн кэпсиир хаһаайка Тамара Михайловна. 
Маны таһынан оҕуруоттара киэҥ, тэпилииссэ иһигэр оҕурсууттан саҕалаан, помидор, арбуз, перец, баклажан арааһын сөбүлээн олордоллор. Бааһынаҕа кытары помидор араас суордун, хаппыыста, бэл диэтэр дьэдьэни киэҥник олордубуттар. Маны барытын уу кутарга, көрөргө-истэргэ сиэннэрэ, хос сиэннэрэ көмөлөһөллөр эбит.
Олбуор иһигэр тыа моонньоҕоно, «хара кыталык» диэн бэйэлэрэ олордубут моонньоҕонноро, араас көрүҥ олордубут мастара үүнэн-сигилээн турар.
Тамара, Афанасий Бояровтар холбоон 80-н тахса сыл атыы-эргиэн ситимигэр эҥкилэ суох үлэлээн кэллилэр. Иллээх дьиэ кэргэн оҕолонон-урууланан Ытык Күөл сис ыаллара буолаллар. Тыа ыалын сиэринэн сүөһү-ас көрөллөр, кууруссалара, кроликтара дэлэй. Сайынын оҕолорун-сиэннэрин кытары бары тэҥинэн оттоон-мастаан, кыһыҥҥыларыгар бэлэмнэнэллэр. Киһи быһыытынан элэккэйдэрэ, аламаҕайдара, сиэрдээхтэрэ Бояровтар нэһилиэккэ дьиҥ чахчы ытыктанар ыаллар. 
Медиа материалы бэлэмнээтэ Андрей Тимофеев.

Елена Слепцова

«Таатта» хаһыат сайтыттан: https://ulus.media/article/68038

от adminNB

Добавить комментарий

Ваш адрес email не будет опубликован.