Бүгүн Нөмүгү нэһилиэгэр күһүҥҥү дьаарбаҥка үгэс быһыытынан ыытылынна. Дьаарбаҥканы олохтоох «Түһүлгэ» КК тэрийэн уонна «Ньургуһун» түмсүү оҕуруоччуттара кыттыылаах тэрилиннэ.
Быйыл сайын Нөмүгү оҕуруоччуттара, хас сылын буоларын курдук, өлгөм үүнүүнү ыллылар. Александра Непряхина, Галина Константинова арбуз, дыня курдук оҕуруот аһын хото олордон өлгөм үүнүүлээхтэр. Валерий Павлов помидор араас суордун олордубутуттан ордук оранжевай өҥнөөх, «Апельсиновый» суортаах помидор ордук минньигэс диир.
Кини сүүһүнэн араас заготовканы оҥорон бүгүн атыыга таһаарда.
Улахан ыйааһыннаах оҕуруот астарыгар күрэххэ үс номинацияҕа Татьяна Прохорова оҕуруотун астара бастаатылар. Ол курдук кини олорпут кабачога, кыһыл помидора ыйааһыннарынан, бөдөҥнөрүнэн бастаатылар. Тыкваҕа Александра Непряхина тыквата бастаата, 15 киилэ ыйааһыннаах.
Яна Андреева сүбүөкүлэтэ 3 киилэ кэриҥэ улааппыт.
Култуура киинэ «Кэрэ тиэргэн » диэн көрүү-куонкуруһугар барыта 15 тиэргэн кытынна. Бастыҥ кэрэ тиэргэнинэн Максимовтар ыал тиэргэннэрэ ааттанна. Бу тиэргэн хаһаайката Розалия сатабыллаах оҕуруоччут. Тиэргэн иһигэр мааны беседка, араас кэрэ сибэккилэрдээх клумбалар, оҕуруот аһа толору. Максимовтар ордук уулусса өттүн сыл аайы араас сибэккилэри күрүөлээн олордон нэһилиэк тас көстүүтүн тупсараллар.
Күрэх кыттыылаахтара, араас тиэргэннээхтэр номинациялары ыллылар. «Ньургуһун» түмсүү тэриллибитэ 10 сыл буолла (салайааччы Августа Гаврильева). Ол тухары былааннаахтык үлэлээн кэллилэр. Нөмүгү олохтоохторо тиэргэннэригэр араас оҕуруот аһын үүннэрии таһынан, аны, саад үүнээйилэрин олордон саҕалаабыттара ыраатта. Ол курдук, садовай малина, моонньоҕон, хаптаҕас, жимолость, вишня, облепиха, яблоко үүннэриитинэн ылсан дьарыктанан кэккэ ситиһиилэннилэр.
Маны таһынан оҕолорун, сиэннэрин үлэҕэ сыһыаран, үлэҕэ көхтөөх гына иитэллэр.
Августа Гаврильева, Нөмүгү с.
Газета «Хаҥалас» («Хангалас») 11.09.23