От ыйын ортото буолла, оҕуруоппут саамай ас биэрэр кэмэ. Ол эрэн билигин даҕаны оҕурсууну үүннэрэргэ үгүс боппуруос үөскүүр. Дьэ, эбии тугунан аһатыахпытын сөбүй?
— Оҕурсуу диэн ханнык баҕарар оҕуруот олордор ыалга биир сүрүн ас буолар. Сайыны быhа тото-хана сиир биир маанылаах аспыт буолар. От ыйыгар, саамай астанар кэмигэр, оҕурсуу эбии аhатыыга наадыйара биллэр суол. Манна сахалыы малтаччы эттэххэ, сибиэһэй ынах сааҕын туһанар ордук, – диэн Чурапчы нэһилиэгин уопуттаах оҕуруотчута Розалия Терентьевна Сухаринова кэпсиир. — Бастатан туран, 10 лиитэрэ ууга биир баһыы сибиэһэй сааҕы кутан теплицэбит иһигэр туруоран кэмиттэн кэмигэр буккуйан туруорабыт. Ол кэнниттэн 10 күҥҥэ биирдэ, быһа холоон биир испиискэ хоруобкатын саҕа уоҕурдуубутун ылан оҕурсуубутугар кутуохтаах уубутар суурайаммыт туһанабыт. Үгүстэр күлү туһаналлар, бу натуральнай уоҕурдуу, макро уонна микро элимиэннэринэн баай. Киниэхэ калий, кальций, магний, фосфор бааллар. Күл буорга туhалаах бактериялары үѳскэтэр.
Куттанар буоллаххтыына күлү эмиэ ууга суурайаҥҥыт уон күҥҥэ биирдэ кутан туһаныаххытын сөп.. Оччотугар оҕурсуу ыарыыттан кѳмүскэллээх буолар уонна астанара түргэтиир. Итини таһынан сибиэһэй оту быһан ылаҥҥыт, саахтаах ууугутугар туруоран көөнньөрүөххүтүн сөп. Бу оҕурсуу ѳр кэмҥэ астанарыгар кѳмѳлѳѳх. Эбэн эттэххэ, оҕурсуу көдьүүстээхтик үүнэригэр астаах биир-икки эрэ лабаалаах буолара ордук, онтон атын быган иһээччилэри сарбыйан, быһан-отон иһиэххэ наада. Оҕурсуу астанар кэмигэр, биир бэйэм биир укка быһа холоон 10 лиитэрэ курдук ууну кутабын.
Сэмэн Жендринскэй
«Саҥа олох» хаһыат сайтыттан: https://санаолох.рф/article/101827