Кулун тутар 15 күнүгэр Сэбиэскэй Сойуус Дьоруойа Федор Кузьмич Попов аатынан Баатара орто оскуолатыгар саҥа сүүрээн быһыытынан «Рост» агролаборатория аһылынна.
Агролаборатория үөрүүлээх арыллыытыгар улуус баһылыга Дмитрий Тихонов, судаарыстыбаннай уонна уопсастыбаннай диэйэтэл, СӨ норуотун хаһаайыстыбатын үтүөлээх үлэһитэ Матвей Мучин, СӨ тыа хаһаайыстыбатын миниистирин бастакы солбуйааччы Анна Стручкова, «Саха сиригэр гражданскай көҕүлээһиннэри өйүүр уонна сайыннарар биир кэлим ресурснай киин» пуонда генеральнай дириэктэрэ Ольга Вешникова, улуустааҕы үөрэҕирии салалтатын салайааччытын солбуйааччы Ирина Плотникова, нэһилиэк баһылыга Дмитрий Акимов кыттыыны ыллылар.
Лабораторияҕа бэйэлэрин өйдөбүнньүктэрин хаалларан сибэкки олортулар.
Людмила Валерьевна күөх экран нөҥүө быһа холбонуунан тэрээһиҥҥэ кыттыһан, тыл этэн эҕэрдэлээтэ.
— Ааспыт сыл балаҕан ыйыгар Баатара оскуолата бырайыак суруйан «Кыах эйгэтэ» («Среда возможностей») оҕо сайдар эйгэтин тэрийиигэ туһуланар Тимченко пуондатын куонкуруһугар кыайыылаах тахсан, грант ылары ситиспитэ. Дария Степановна Жиркова салайыытынан Баатара оскуолатын оҕолоро тохсунньу 16 күнүттэн күөх үүнээйилэрин олордон, көрөн-истэн, бүөбэйдээн номнуо оҕурсуларын, салааттарын, укуруоптарын быһан амсайбыттар.
Үөрэнээччилэр бэйэлэрэ үөрэтэр-чинчийэр үлэнэн дьарыктанан, аныгы олох тэтимин кытта тэҥҥэ тыа хаһаайыстыбатыгар саҥа сүүрээннэри, ньымалары толору баһылаан, идэлэрин таба талалларыгар табыгастаах эйгэ тэрилиннэ.
Оҕолорбут саҥа саҕалаабыт бырайыактара ситиһиилээх, кэскиллээх буоларыгар, инникитин өссө кэҥээн-тэнийэн иһэригэр баҕарабын!
Бу бырайыак олоххо киирэригэр күүс-көмө буолбут биир дойдулаахпытыгар Людмила Валерьевна Николаеваҕа улахан махталбын тиэрдэбин, — диэн улуус баһылыга Дмитрий Тихонов телеграм каналыгар иһитиннэрдэ.
СӨ ТХПП Министерствотын сайтыттан https://minsel.sakha.gov.ru/news/front/view/id/3391572