Бүлүү куоратыгар интэриэһинэй дьарыктаах дьон аҕыйаҕа суох. Кинилэр сүрүн үлэлэриттэн быыс булан, сөбүлээбит идэлэринэн умсугуйан дьарыктаналлар, ол дьарыктарын өссө туһаҕа таһаараллар. Бүлүү олохтооҕо Григорьева Римма кэрэни үксэтэр идэлээх. Тыйыс айылҕалаах, кылгас сайыннаах дойдубутугар араас дьэрэкээн сибэккилэри көрөн-харайан, үүннэрэн таһааран биһиги тулабытын киэргэтэр, дьон дууһатын сылаанньытар. Римма кэрэ-нарын сибэккилэрэ төрөөбүт куораппыт уулуссаларыгар, элбэх дьон тиэргэннэригэр сайын аайы тэтэрэллэр.
— Сибэкки олордуутунан дьарыктаммытым ыраатта, — диэн кэпсиир Римма Егоровна, — Кыра-кыралаан 2009 сылтан саҕалаабытым. Бастаан ыаллыы олорор дьүөгэм Марфа Матвеевна сибэккини олордорун көрөн, кинини үтүктэн дьарыктанан барбытым. Өссө биир ыал баар этэ, элбэх сибэккини олордор, кинилэри наһаа интэриэһиргээбитим, ол гынан баран сибэккини дьарык гыныам диэн санаабатаҕым. Ол да сылларга сибэкки сыаната ботуччу буолааччы.
— Сотору кэминэн боростуой сибэккилэри олордон саҕалаабытым, астра, гелиопсис иҥин, онтон арай өйдөөбүтүм, киһи барыта петунияны көрдүүр эбит. Ол саҕана петуния хайдаҕын да билбэт этим, оччолорго интернет улаханнык үөдүйбэтэх этэ, ол да буоллар кимтэн эрэ ыйыталаһан, ханна эрэ ааҕан, сиэмэтин булан петуния олордор буолбутум. Онтон ыла сөбүлээн саамай элбэхтик олордор сибэкким — петуния. Нап-нарын, тэтэркэй петуния сайыны быһа сибэккилиир, судургу көрүүлээх-харайыылаах, тымныыны тулуйар.
— Сибэккилэрбин кулун тутартан олордон барабын, сорохторун тохсунньуттан саҕалыыбын. Интернет-маҕаһыынтан профессиональнай сиэмэни уонна уоҕурдуулары сакаастаан ылабын.
Петуния хас да көрүҥнээх буолар — кустовой, ампельнай уонна вегетативнай. Вегетативнайы череногын атыылаһабын, сороҕун бэйэм черенкуйдуубун, сороҕун сиэмэнэн олордобун. Үүннэрэргэ туох да оннук айылаах кистэлэҥ ньыма суох буолан баран, атын сибэккинэн дьарыктанар блогердары кытта мэлдьи кэпсэтэбит, уопут атастаһабыт, сүбэлэһэбит.
— Теплица туттан кэлин элбэҕи олордор буоллубут. Теплицаларым уопсайа 74 кв. м. иэннээхтэр. Биһиэхэ Бүлүүгэ газ баар буолан, наһаа ночоото суох, газпытын кулун тутартан холбуубут. Кыһын олордор табыгаһа суох, наһаа тымныы. Сибэккилэрбин бастаан биир теплицаҕа олордобун, онтон атын арыый сөрүүн теплицаҕа таһаарабын, петуниялар сөрүүнү сөбүлүүллэр, — диэн быһаарар уопуттаах сибэкки үүннэрээччи.
Римма Егоровна Бүлүү куорат дьаһалтатын кытта ылсан 2016 сылтан үлэлэспит. Улуус дьаһалталара рассаданы эмиэ сакаастыыллар. Элбэҕи чааһынай дьоҥҥо атыылыыр. Онон дьиэ кэргэн хааһынатыгар эбии дохуот киллэринэр.
— Хайдах үлэҕиттэн быыс булан, маннык дьарыктанаҕын диэн ыйытыыбар:
— Оҕуруотчут үлэтэ саамай үгэннээбит кэмигэр — муус устар ыйга “кураанах” уоппуска ылабын уонна Маай бырааһынньыктарын быыстарыгар пенсионнай уоппускабын туһанабын. Кэргэним Реворий Валерьевич күүскэ көмөлөһөр, оҕом эмиэ илии-атах буолар, — диэн кэпсиир Римма Егоровна.
Дьэ, кырдьык, соруммут киһи хайдах баҕарар быыс булан, балаһыанньаттан тахсар эбит. Онон “кто хочет, ищет возможности, кто не хочет – причины” диэн сөпкө этиллэр эбит. Өссө биир дьээбэ соҕус ыйытыылаах буоллум:
— Сибэкки, оҕуруот аһа үүнэр, үүммэт киһилээх үһү дии, ол кырдьык дуо?
— Мин саас төрөөбүтүм, ол иһин миэхэ үүнэр быһыылаах, — мичээрдиир Римма Егоровна.
* * *
Онтон саамай сүрүн кистэлэҥ – таптал буоллаҕа дии. Ол баар саамай туһалаах ньыма. Таптыыр идэҕинэн дьарыктанар буоллаххына, тутатына дуу, кэмниэ кэнэҕэс дуу туох барыта табыллар, туох барыта сатанар.
Изольда Загитова.
«Олох суола» хаьыат сайтыгар: https://олохсуола.рф/article/99284