«Чкалов сирэ барахсан сылаас салгыннаах. Сибэкки, оҕуруот аһа үчүгэйдик үүнэр» диир арыы сиргэ олорор Людмила Родионова. «Дьаныһан туран ис сүрэхтэн дьарыктаннахха үүнүү кэлэр. Эрдэттэн дьаһаннахха барыта табыллар. Сибэккилэрим, отонноох мастарым ситэн, силигилээн тураллара хараҕы үөрдэр».
Людмила Ивановна Чкаловка олорбута ыраатта. «1996 сыллаахха аан бастаан кэргэним тэпилииссэ туппута. Оҕуруот тэринэн үүнээйинэн дьарыктанан саҕалаабытым. Клубника олордубутум үһүс сыла. Инники дьэдьэн олордор этим. Клубникам аһа бөдөҥ, минньигэс. Оҕолор олус сөбүлүүллэр» — салгыы кэпсиир кини. Оҕуруот аһын, отонноох сэппэрээктэри, сибэкки арааһын үүннэриигэ сүбэ-ама биэрдэ: «Куттаммакка ылсан иһиҥ. Саҥаттан саҥаны үүннэриҥ. Үүнээйи илии сылааһын билэр. Мин эксперименниирбин сөбүлүүбүн. Билигин интернеккэ сүбэ элбэх. Удобрениены мээнэ туттубаппын. Үүнээйибин сиэмэлээн үүннэрэрбин сөбүлүүбүн, отонноох мастарбын кытары, оччоҕо ордук бөҕө-таҕа, тымныы салгыны, курааны, ыарыыны тулуйумтуо буолар».
Хаһаайка тэлгэһэтэ уурбут-туппут курдук. Сибэкки эгэлгэтин манна көрөҕүн. Ырай саада. Араас мас, сэппэрээк элбэх – моонньоҕон, акация, яблоня, хаппараас, жимолость…Сибэкки туһунан этиллибэт даҕаны. Людмила сиэмэтин сорҕотун ахсынньы ыйтан тылыннарар. Өссө таһырдьа хаардаахха, этэригэр дылы, тэпилииссэ аана арыллар буоллун даҕаны, кирээдэлэригэр сылгы сааҕын кутарын кэпсээтэ, буорун онон сылытарын этэр.
Сайыммыт кылгас, онон эрдэ олордор үчүгэй. Үксүн кулун тутартан рассадалыыр. Сыллата ордугун биир дойдулаахтарыгар үүннэрэн атыылыыр. Клубникатын сиэмэтин Нам оҕуруоччута Кривошапкинныын кыттыһан да сакаастыыр, ыам ыйыгар ыстакааннарга олордор. Бу дьэдьэн кумахтаах соҕус буорга үүнэр диир. Хаппыыстатын от ыйыттан сиир буолар, атын оҕуруотун аһа эмиэ эрдэ ситэр. Хаһаайка тугу хаһан олордубутун, төһө аһы биэрбитин эҥин суруйан иһэр эбит. Онон кэтээн, тэҥнээн көрөн дьаһайар. Оҕурсуну хас да суорду тэҥҥэ үүннэрэр, куоппаһырарыгар да үчүгэй диир. Помидору эмиэ арааһы үүннэрэ сылдьыбыт, хараҥаҕа тиийэ. Малинатын суордун саҥардыан баҕарар.
Сибэккитин, розаны, пионнары, хото үүннэрэр соруктаах. Киһи сиир астаах яблоняны бүөбэйдээн көрөр санаалаах. Оттон үүнээйини үөнтэн-көйүүртэн сыттаах сибэккини, холобур, бархатцыны, олордон көмүскүүрүн үллэстэр. «Уубут аны элбэх. Дьокутааппыт Алиш Мамедов сайыҥҥы уу ситимин тардыыга көмөлөһөн абыраата» диэн махтанар. Оҕуруот үлэтигэр кэргэнэ Александр көх-нэм буолар. Үс оҕолоох ийэ, элбэх сиэн эбээтэ сэргэх киһи. Медпууҥҥа үлэлиир.
Людмила Родионова оҕуруотуттан астынар. Хайа уонна бэйэ бүөбэйдээн үүннэрбит аһа минньигэс буоллаҕа. Ыраас, доруобуйаҕа туһалаах. Маннык дьоһун дьарыктаах дьон бааллара олус үчүгэй. Күһүммүт сылаас, сырдык буоллун, оҕуруот аһынан дуоһуйа күндүлээтин.
Варвара Кузьмина